печатать
03 сентября 2015

Жаңа оқу жылы: жаңа міндет, жаңа бастама

День Знаний

   2015 жылдың 1 қыркүйек күні «Арыстан» мамандандырылған лицейінде жаңа оқу жылының басталуына салтанатты түзілім мен Білім күніне арналған «Менің Отаным – Қазақстан» тақырыбында республикалық бейбітшілік пен келісім сабағы өткізілді.
   Сағат таңғы 10.00. Лицей алаңына командирлердің жетекшілігімен сынып бойынша сап түзеген лицеистер, мінберде Лицей әкімшілігі мен құрметті қонақтар: ҚР ҚК мен Шекара қызметінің генералдары мен офицерлері, Талғар ауданының қорғаныс істері жөніндегі әкімшілік пен Басқарма өкілдері және ата-аналар.
Далее...
   Мерекелік жиынның басталғанын білдіретін белгіден (фанфар) кейін Лицей басшысына дайындық туралы баянат берілді. Үрмелі оркестрдің сүйемелдеуімен Ту ұстаушы топ құрамы: запастағы капитан Оразов Б.Ә. және оқу үлгерімі мен сап дайындығы бойынша 11 сыныптың үздік лицеистері – Р.Мыхан, Д.Тілеухан, Е.Мейірманов «Арыстан» мамандандырылған лицейінің Туын ортаға алып шықты.
   Мемлекеттік Әнұран орындалған соң, Лицей бастығы, запастағы генерал-майор, педагогика ғылымдарының докторы Тауланов Сәбит Сауменұлы жаңа оқу жылымен құттықтады.
   2014-2015 оқу жылында «Үздік рота», «Үздік сынып» атағы үшін жүргізілген сайыстың қорытындысын Лицей бастығының орынбасары запастағы полковник Райхель Владимир Анатольевич жариялады. Бұл құрметке І рота мен 11 «Г» сыныбы иеленді.
   Лицей шәкірттерінің қалалық, республикалық, халықаралық сайыстарға белсене қатысып қана қоймай, жүлделі орындар алатыны белгілі. 2015 жылдың көктемінде Оксфорд университетінің ұйымдастыруымен өткен «Say it with Oxford» халықаралық сайысында қазіргі 11 «А» сынып лицеистері Бисенев Б., Аубакиров Ш., Тлекқабыл Д. ағылшын тілі пәні мұғалімі Досмурзина Динара Баксикқызы жетекшілігімен орындаған жұмыстарының қорытындысымен Оксфорд университетінің Баспа өкілдері халықаралық жарыстың 2-орын иелерін марапаттап, сыйлықтарын табыс етті.
   2015 жыл - тарихи даталар мен мерейтойларға толы жыл. Сондықтан да, мазмұнды музыкалық-театрландырылған қойылымдар арқылы тәуелсіз еліміздің болашағы - жастар, соның ішінде, арыстандықтардың басты үлес қосатындығы сөз етілді.
   Бұл мерекені бізбен бөлісуге келген құрметті қонақтардан құттықтауы мен аманат сөздерін запастағы генерал-майор Айтқали Ғұсманұлы Есенғұлов, ата-аналар атынан жылы лебізін Изимов Тельман Ахметжанұлы жеткізді. ҚР Әуе Шекара әскері ән-би ансамблінің әншілері ән шашу тарту етсе, ҚР ҚК Аэромобильді әскері десантшыларының қоян-қолтық ұрыс тәсілдерінен көрсетілімі тамашаланды. Ал Елена Ивановна Евстратенконың жетекшілігімен ҚР Ұлттық гвардиясының Үрмелі оркестрі мерекелік шараны бастан аяқ музыкамен әрледі.
   Лицей түлектері атынан жүрек тебірентерлік құттықтауын 11 «Б» сынып лицеисі Қойшин Асанға, ал лицеистер қатарына қосылғаны туралы өз қуанышы мен әсерін бөлісуге 9-сынып лицеисі Еркінбекұлы Сәдуақасқа сөз берілді. Олардың ҚР ҚК қатарын толықтырудағы асқақ армандарының орындалуына барлық қатысушылар тілектес болдық.
   Салтанатты жиынның басты міндеттерінің орындалуына кезек келді. Сыңғырлаған қоңырау үні 2015-2016 оқу жылының басталу себебін баяндады. Ерсағидың жұлқи соққан қоңырауы жазғы демалыстан маужырап келген лицеистерді «ұйқысынан» оятты.
   Лицей ашылғалы қалыптасқан дәстүрлердің бірі – Ту көтеру. Жыл сайын 1 қыркүйекте 9-11 сыныптың үздік лицеистері Лицей Әнұраны орындалу барысында «Арыстан» мамандандырылған лицейінің Туын көтереді. Бұл тек лицеистер ғана емес, педагогикалық ұжым мен лицей қызметкерлерінің де қуанышты сәттерінің бірі. Өйткені шәкірттерді ізденімпаз, білімді, ұтқыр ойлы, дарынын ашып, саналы тәрбие беру – лицей ұстаздарының басты мақсаты. Ұстаздарға деген сағыныш пен алғыс сезімдерін гүл шоқтарын табыс етумен жиынның негізгі бөлімі аяқталды.
   «Арыстан» мамандандырылған лицей оқушыларының толық құрамы салтанатты шерумен мерекелік жиынды аяқтады. Бұл дәстүрлі және көркем әскери рәсім ұрпақтар жалғастығын көрсе отырып, әр лицеистің жүрегіне мақтаныш сезімін ұялатады. Сап түзеген шеруде қалалық, облыстық, республикалық, халықаралық олимпиада мен түрлі жарыстарға қатысып, лицей абыройын асқақтатып жүрген лицеистердің есімдері мақтанышпен аталды: А. Аимбетов, М. Бимолдан, О. Махуров, Т. Ақтанов, А. Темірханов, А. Адхамов, И. Ахметжан, С. Петренко, Д. Дархан, А. Адамбек, А. Құрмантаев, Н. Шаймолданов, Ө. Ходжабеков, «21 ғасыр көшбасшысы» зияткерлік ойынының қатысушылары, және апталық ойын жеңімпаздары: Аимбетов А., Авбаширов Д., Шамганов А.
   Республикамыздың түкпір-түкпірінен жиналған бұл лицеистердің, әсіресе олардың ата-аналарының қуаныштарында шек жоқ. Мәпелеп өсірген балауыз ұлдарының нағыз ер-азамат болып ер жетуіне, абыройлы мамандыққа жол сілтеушілердің қанатынан өмірлік азық алатынына сенімдері мол.
   Биылғы оқу жылында Лицей 5 жылдық мерейтойын атап өтпекші. Ендеше, шығармашылыққа толы жемісті де, жеңісі мол жыл болғай, арыстандықтар!

Мақала авторы: Терлікбаева М.Ж., қазақ тілі мен әдебиеті пәндері мұғалімі.
count631854631854 
webart.kz
Создание сайта
WebArt Design Studio
Copyright © 2017 Лицей “АРЫСТАН”. Все права защищены