печатать
27 апреля 2015
Визит тяжелоатлетов

   09.04.2015 жылы қазақстандық ауыр атлетика спортшылары "Арыстан" мамандандырылған лицейінің оқушыларымен кездесті. Қазақстанның мақтанышына айналған әрі АИБА Бүкіләлемдік бокс Академиясында "Чемпиондар аллеясын" ашып, әлем чемпионы атанған Жасұлан Қыдырбаев және әлем біріншілігінің чемпионы Кирилл Павлов, ауыр атлетикадан құрама командасының бас бапкері Алексей Ни және бапкер Тойшан Бектеміров лицеистердің ыстық ықыласына бөленіп, өз ойларымен, болашақ жоспарларымен бөлісті.
   "Арыстан" лицейі лицеистерді үнемі танымал қоғам қайраткерлерімен, әскери қызметкерлермен, атақты спортшылармен кездестіріп, жас өрендердің жүректеріне ерлікке құрмет сезімін егіп келеді. Әрбір кездесуден тамаша бір әсер қалып, құштарлық сезімі оянады.
подробнее
   Лицейдің басшысы, генерал-майор Сәбит Тауланов қонақтарды қарсы алып, бүкіл оқу орнының аумағын көрсетіп, оқытушылар мен лицеистермен таныстырды, олар лицейдің ішкі-сыртқы бет-бейнесіне риза болып, бұндай арнаулы орта оқу орны әлем бойынша да аз кездесетінін айтып, «Арыстан» лицейінің басшылығына алғыс сезімдерін білдірді.
   Ауыр атлетика командасының мүшелерінің бірі, жас чемпион Жасұлан Қыдырбаев: «Тіпті ,"Арыстанға" түскім келді, ол үшін мектеп уақытына да оралуға дайынмын!» десе, Алексей Ни Геннадьевич: «Осындай оқу тәртібі бар лицейді бірінші рет көріп отырмын. Болашақта "Арыстан" америкалық "Вест пойнт" академиясы секілді бүкіл әлемге танымал болатынына сенімдімін. Болашақта нағыз ер азаматтарды, Отан қорғаушыларды дайындайтын осындай оқу орындарды көбею керек!"- деп ағынан жарылып, лицейдің Қамқоршылар кеңесіне зор ризашылық білдірді.
   Кирилл Павлов болса: "Менің де сендер сияқты әскери қызметке деген қатысым бар. Бұрын әскерлер арасында жарысқа да қатыстым, әскери кешендерінің көбін көрдім, бірақ шынымен айтсам, "Арыстандай" оқу орнын бұрын көрген жоқпын. Кіре берістен бастап әскери нұсқау көрініп тұр, бүгін сізге келгеніміз үшін қуаныштымын"- деп, осындай тамаша оқу орнында оқып жатқаны үшін лицестер бақытты екенін айтып өтті Айтса айтқандай, «Арыстанда» оқимын деген жас өренге барлық жағдай жасалған, спорттың кез-келген түрімен айналыса алады, болашақ әскери элитаны қалыптастыратын, теңдессіз оқу мекемесі.
   Жасұлан Қыдырбаев көрген, білген, алған әсерлерімен бөлісе отырып былай деді: "Осындай оқу орнына өзім бірінші рет келіп отырмын, және бұл өмірімдегі ашылыс сияқты. Әр оқушының сөйлегені, балалардың ойы, мақсаты, талпынысы, болашаққа деген арманы қандай екені көзден де, сөйлеген сөздерінен де білініп тұр. Бұны көріп қуандым. Ондай тәрбиеге алып келетін оқу орындары көбейсе, болашақ ұрпағымыздың өзгеруіне атсалуымыз әбден мүмкін. Біз бар, сіз бар - ұрпақты ойлау баршамыздың міндеті. Өз Отанымыз өзге елден артық екендігін ұмытпаңыздар. Бізге Қазақстан үшін еңбек етіп, Қазақстанымыздың туын биікке көтеру үшін еңбек ету үлкен мәртебе. Біз де, спортшылар, сарбазбыз.Біз де туымызды көтеріп, шетелге барып, спорт майданында “соғысып“, Отан үшін деп жарысқа шығамыз. Бір жағынан, сізге көмек беріп отырмыз ғой, былай қарасақ. Отанды қорғауда басты міндет атқаратын - сіздер, біз көмекші боламыз. Бірге елімізді қорғап жүрейік". Чемпионның бұл жүрекжарды сөздерін қоштаған лицеистердің соққан шапалақ үні акт залында көпке дейін басылмай тұрды.
   Алексей Геннадьевич те спортшы мен әскери адамдардың мүдделері ұқсастығын сөз етті: "Спортшыларды және әскерді дайындау барысында ең бастысы - тәртіп. Тәртіпсіз жеңістер де болмайды, тренердің еңбегі спортсменді баптауға кеткен, сіздерді оқытып жатқан ұстаздардың еңбегімен бірдей. Жеңіске жетсек, қуанамыз, кемшіліктерімізбен жұмыс істейміз".
   "Арыстан" лицейі ¬- 9-11 сынып оқушыларына білім беретін, ерлікке, әскери өнерге, Отан қорғауға тәрбиелейтін, құрышты шыңдап, болатқа айналдыратын білім ордасы, мықтылардың, төзімділіктің ұстаханасы. Оқу интернаттық жүйеде тегін беріледі. «Жүзден жүйрікті, мыңнан тұлпарды» іріктеп алу өте қиын. Болашақ лицей оқушылардан әскери, физикалық дайындық пен жаратылыстану бағытындағы пәндерден жоғары сапаны талап етеді. Лицей "Нұрсұлтан Назарбаевтың Білім беру қоры» Қоғамдық қорының филиалы болып табылады.
   Қазақстанның көк туын спорт көгінде желбіретіп жүрген жеңімпаз чемпиондармен жүздесіп, пікірлескен лицеистер олардың құрметіне өз шығармашылық өнерлерін тарту етіп, кетерлерінде «қонақкәде» ретінде шағын естелік сыйлықтарын сыйлады.
   «Арыстандық» лицеистердің жүрегінде тамаша кездесуден жарқын естеліктер қалды, әлем чемпиондары мен олардың бапкерлерінің тағылымды сөздері талай жүректі толғантары анық.
count14676001467600 
webart.kz
Создание сайта
WebArt Design Studio
Copyright © 2017 Лицей “АРЫСТАН”. Все права защищены